К коринфянам второе послание святого апостола Павла The second Epistle of the holy Apostle Paul to the Corinthians   ЧИСТЫЙ ИНТЕРНЕТ о Библии
1

К коринфянам второе послание святого апостола Павла


The second Epistle of the holy Apostle Paul to the Corinthians КЪ КОРІ́НѲѦНѠМЪ ВТОРО́Е ПОСЛА́НІЕ СТ҃А́ГѠ А҆ПО́СТОЛА ПА́ѴЛА. Глава̀ пе́рваѧ. (заⷱ҇ рѯ҃з) сⷯ а҃ Па́ѵелъ꙳[1] посла́нникъ і҆и҃съ хрⷭ҇то́въ, во́лею бж҃їею: и҆ тїмоѳе́й бра́тъ, це́ркви бж҃їей сꙋ́щей въ корі́нѳѣ, со ст҃ы́ми всѣ́ми сꙋ́щими во все́й а҆ха́їи: в҃ Бл҃года́ть ва́мъ и҆ ми́ръ ѿ бг҃а ѻ҆ц҃а̀ на́шегѡ, и҆ гдⷭ҇а і҆и҃са хрⷭ҇та̀. (заⷱ҇) [а҃] г҃ Бл҃гослове́нъ꙳꙳[2] бг҃ъ, и҆ ѻ҆ц҃ъ гдⷭ҇а на́шегѡ і҆и҃са хрⷭ҇та̀, ѻ҆ц҃ъ щедро́тъ и҆ бг҃ъ всѧ́кїѧ ᲂу҆тѣ́хи: д҃ Оу҆тѣша́ѧй на́съ ѡ҆ всѧ́кой ско́рби на́шей, ꙗ҆́кѡ возмощѝ на́мъ ᲂу҆тѣ́шити сꙋ́щыѧ во всѧ́кой ско́рби, ᲂу҆тѣше́нїемъ, и҆́мже ᲂу҆тѣша́емсѧ са́ми ѿ бг҃а. є҃ Занѐ ꙗ҆́коже и҆збы́точествꙋютъ страда̑нїѧ хрⷭ҇то́ва въ на́съ, та́кѡ хрⷭ҇то́мъ и҆збы́точествꙋетъ и҆ ᲂу҆тѣше́нїе на́ше. ѕ҃ А҆́ще ли же скорби́мъ, ѡ҆ ва́шемъ ᲂу҆тѣше́нїи, и҆ спасе́нїи, дѣ́йствꙋющемсѧ въ терпѣ́нїи тѣ́хже страда́нїй, ꙗ҆̀же и҆ мы̀ стра́ждемъ: з҃ И҆ ᲂу҆пова́нїе на́ше (л. рк҃и ѡ҆б.) и҆звѣ́стно ѡ҆ ва́съ. а҆́ще ли ᲂу҆тѣша́емсѧ, ѡ҆ ва́шемъ ᲂу҆тѣше́нїи и҆ спасе́нїи: вѣ́дѧще, занѐ ꙗ҆́коже ѻ҆́бщницы є҆стѐ страсте́мъ на́шымъ, та́кожде и҆ ᲂу҆тѣше́нїю. Коне́цъ четверткꙋ̀, и҆ мꙋ́ченикѡмъ. (заⷱ҇ рѯ҃и) и҃ Не бо̀ хо́щемъ ва́съ, бра́тїе,꙳[3] не вѣ́дѣти ѡ҆ ско́рби на́шей бы́вшей на́мъ во а҆сі́и, ꙗ҆́кѡ по премно́гꙋ и҆ па́че си́лы ѡ҆тѧготи́хомсѧ, ꙗ҆́кѡ не надѣ́ѧтисѧ на́мъ и҆ жи́ти. ѳ҃ Но са́ми въ себѣ̀ ѡ҆сꙋжде́нїе сме́рти и҆мѣ́хомъ, да не надѣ́ющесѧ бꙋ́демъ на сѧ̀, но на бг҃а возставлѧ́ющаго мє́ртвыѧ: і҃ И҆́же ѿ толи́кїѧ сме́рти и҆зба́вилъ ны̀ є҆́сть, и҆ и҆збавлѧ́етъ: на́ньже и҆ ᲂу҆пова́хомъ, ꙗ҆́кѡ и҆ є҆щѐ и҆зба́витъ. а҃і Поспѣша́ющымъ и҆ ва́мъ по на́съ моли́твою: да ѿ мнѡ́гъ ли́цъ є҆́же въ на́съ дарова́нїе, мно́гими благодари́тсѧ ꙾ѡ҆ ва́съ꙾[4]. Коне́цъ сꙋббѡ́тѣ. (заⷱ҇ рѯ҃ѳ) в҃і Похвале́нїе бо на́ше꙳꙳[5] сїѐ є҆́сть, свидѣ́тельство со́вѣсти на́шеѧ, ꙗ҆́кѡ въ простотѣ̀ и҆ чистотѣ̀ бж҃їей, а҆ не въ мꙋ́дрости пло́ти, но бл҃года́тїю бж҃їею жи́хомъ въ мі́рѣ, мно́жае же ᲂу҆ ва́съ. г҃і Не и҆на̑ѧ бо пи́шемъ ва́мъ, но ꙗ҆̀же чтетѐ, и҆ разꙋмѣва́ете: ᲂу҆пова́ю же, ꙗ҆́кѡ и҆ до конца̀ ᲂу҆разꙋмѣ́ете: д҃і Ꙗ҆́коже и҆ разꙋмѣ́сте на́съ ѿ ча́сти, ꙗ҆́кѡ похвале́нїе ва́мъ є҆смы̀, ꙗ҆́коже и҆ вы̀ на́мъ, въ де́нь гдⷭ҇а на́шегѡ і҆и҃са хрⷭ҇та̀. [в҃] є҃і И҆ си́мъ ᲂу҆пова́нїемъ хотѣ́хъ къ ва́мъ прїитѝ пре́жде, да вторꙋ́ю бл҃года́ть и҆́мате: (л. рк҃ѳ) ѕ҃і И҆ ва́ми проитѝ въ македо́нїю, и҆ па́ки ѿ македо́нїи прїитѝ къ ва́мъ, и҆ ва́ми проводи́тисѧ во і҆ꙋде́ю. з҃і Сїе́ же хотѧ̀, є҆да̀ что̀ ᲂу҆́бѡ легкото́ю дѣ́ѧхъ; и҆лѝ ꙗ҆̀же совѣщава́ю, по пло́ти совѣщава́ю; да бꙋ́детъ ᲂу҆ менѐ є҆́же є҆́й, є҆́й: и҆ є҆́же нѝ, нѝ. и҃і Вѣ́ренъ же бг҃ъ, ꙗ҆́кѡ сло́во на́ше, є҆́же къ ва́мъ, не бы́сть є҆́й и҆ нѝ. ѳ҃і И҆́бо бж҃їй сн҃ъ і҆и҃съ хрⷭ҇то́съ, и҆́же ᲂу҆ ва́съ на́ми проповѣ́данный, мно́ю и҆ сїлꙋа́номъ и҆ тїмоѳе́емъ, не бы́сть є҆́й и҆ нѝ: но въ не́мъ само́мъ є҆́й бы́сть. к҃ Є҆ли̑ка бо ѡ҆бѣтова̑нїѧ бж҃їѧ, въ то́мъ є҆́й, и҆ въ то́мъ а҆ми́нь, бг҃ꙋ къ сла́вѣ на́ми. Коне́цъ пѧткꙋ̀. (заⷱ҇ р҃ѻ) к҃а И҆звѣствꙋ́ѧй же на́съ꙳[6] съ ва́ми во хрⷭ҇та̀, и҆ пома́завый на́съ, бг҃ъ: к҃в И҆́же и҆ запечатлѣ́вый на́съ, и҆ да́вый ѡ҆брꙋче́нїе дх҃а въ сердца̀ на́ша. к҃г А҆́зъ же свидѣ́телѧ бг҃а призыва́ю на мою̀ дꙋ́шꙋ, ꙗ҆́кѡ щадѧ̀ ва́съ ктомꙋ̀ не прїидо́хъ въ корі́нѳъ: к҃д Не ꙗ҆́кѡ ѡ҆блада́емъ вѣ́рѣ ва́шей, но ꙗ҆́кѡ споспѣ́шницы є҆смы̀ ва́шей ра́дости: вѣ́рою бо стоитѐ. Глава̀ втора́ѧ. сⷯ а҃ Сꙋди́хъ же въ себѣ̀ сїѐ, не па́ки ско́рбїю къ ва́мъ прїитѝ. в҃ А҆́ще бо а҆́зъ ско́рбь творю̀ ва́мъ: то̀ кто̀ є҆́сть веселѧ́ѧй мѧ̀, то́чїю прїе́млѧй ско́рбь ѿ менѐ; г҃ И҆́бо писа́хъ ва́мъ сїѐ и҆́стое, да не прише́дъ ско́рбь на ско́рбь прїимꙋ̀, ѡ҆ (л. рк҃ѳ ѡ҆б.) ни́хже подоба́ше мѝ ра́доватисѧ, надѣ́ѧсѧ на всѧ̀ вы̀: ꙗ҆́кѡ (заⷱ҇ рѻ҃а) Моѧ̀ ра́дость꙳[7] всѣ́хъ ва́съ є҆́сть. д҃ Ѿ печа́ли бо мно́гїѧ и҆ тꙋгѝ се́рдца написа́хъ ва́мъ мно́гими слеза́ми, не ꙗ҆́кѡ да .ѡ҆скорбите́сѧ, но любо́вь да позна́ете, ю҆́же и҆́мамъ и҆з̾ѻби́льнѡ къ ва́мъ. Коне́цъ недѣ́ли. є҃ А҆́ще ли кто̀ ѡ҆скорби́лъ менѐ, не менѐ ѡ҆скорбѝ, но ѿ ча́сти, да не ѡ҆тѧгчꙋ̀, всѣ́хъ ва́съ. ѕ҃ Дово́льно бо таково́мꙋ запреще́нїе сїѐ, є҆́же ѿ мно́гихъ. з҃ Тѣ́мже сопроти́вное па́че ва́мъ дарова́ти и҆ ᲂу҆тѣ́шити, да не ка́кѡ мно́гою ско́рбїю поже́ртъ бꙋ́детъ таковы́й. и҃ Тѣ́мже молю́ вы, ᲂу҆тверди́те къ немꙋ̀ любо́вь. ѳ҃ На сїе́ бо и҆ писа́хъ, да разꙋмѣ́ю и҆скꙋ́сство ва́ше, а҆́ще во все́мъ послꙋшли́ви є҆стѐ. і҃ Є҆мꙋ́же а҆́ще что̀ да́рꙋете, и҆ а҆́зъ и҆́бо а҆́зъ а҆́ще что̀ дарова́хъ, є҆мꙋ́же дарова́хъ, ва́съ ра́ди ѡ҆ лицѣ̀ і҆и҃съ хрⷭ҇то́вѣ. [г҃] а҃і Да не ѡ҆би́дими бꙋ́демъ ѿ сатаны̀: не не разꙋмѣва́емъ бо ᲂу҆мышле́нїй є҆гѡ̀. (пѧⷦ҇) в҃і Прише́дъ же въ трѡа́дꙋ во благовѣ́стїе хрⷭ҇то́во, и҆ две́ри ѿве́рзенѣ мѝ бы́вшей ѡ҆ гдⷭ҇ѣ, г҃і Не и҆мѣ́хъ поко́ѧ дꙋ́хꙋ моемꙋ̀, не ѡ҆брѣ́тшꙋ мѝ ті́та бра́та моегѡ̀: ꙾но ѿре́ксѧ и҆̀мъ꙾[8], и҆зыдо́хъ въ македо́нїю. (заⷱ҇ рѻ҃в) д҃і Бг҃ꙋ же꙳꙳[9] благодаре́нїе, всегда̀ побѣди́тели на́съ творѧ́щемꙋ ѡ҆ хрⷭ҇тѣ̀ і҆и҃сѣ, и҆ воню̀ ра́зꙋма є҆гѡ̀ (л. р҃л) ꙗ҆влѧ́ющꙋ на́ми во всѧ́комъ мѣ́стѣ. є҃і Ꙗ҆́кѡ хрⷭ҇то́во благоꙋха́нїе є҆смы̀ бг҃ови, Коне́цъ понедѣ́льникꙋ. въ спаса́емыхъ, и҆ въ погиба́ющихъ. ѕ҃і Ѻ҆́вѣмъ ᲂу҆́бѡ вонѧ̀ сме́ртнаѧ въ сме́рть: ѻ҆́вѣмъ же вонѧ̀ живо́тнаѧ въ живо́тъ. и҆ къ си́мъ кто̀ дово́ленъ; з҃і Нѣ́смы бо, ꙗ҆́коже мно́зи, нечи́стѡ проповѣ́дающїи сло́во бж҃їе: но ꙗ҆́кѡ ѿ чистоты̀, но ꙗ҆́кѡ ѿ бг҃а, пред̾ бг҃омъ во хрⷭ҇тѣ̀ глаго́лемъ. Глава̀ тре́тїѧ. сⷯ а҃ Зачина́емъ ли па́ки ꙗ҆̀же на́съ самѣ́хъ и҆звѣщава́ти ва́мъ; и҆лѝ тре́бꙋемъ, ꙗ҆́коже нѣ́цыи, и҆звѣщава́тельныхъ посла́нїй къ ва́мъ, и҆лѝ ѿ ва́съ и҆звѣсти́тельныхъ; в҃ Посла́нїе бо на́ше вы̀ є҆стѐ, напи́саное въ сердца́хъ на́шихъ, зна́емое и҆ прочита́емое ѿ всѣ́хъ человѣ̑къ. г҃ Ꙗ҆влѧ́еми, ꙗ҆́кѡ є҆стѐ посла́нїе хрⷭ҇то́во, слꙋ́женое на́ми, напи́сано не черни́ломъ, но дх҃омъ бг҃а жи́ва: не на скрижа́лѣхъ ка́менныхъ, но на скрижа́лѣхъ се́рдца пло́тѧныхъ. Коне́цъ вто́рникꙋ. (заⷱ҇ рѻ҃г) д҃ Надѣ́ѧнїе же таково̀꙳[10] и҆́мамы хрⷭ҇то́мъ къ бг҃ꙋ: є҃ Не ꙗ҆́кѡ дово́льни є҆смы̀ ѿ себѐ помы́слити что̀, ꙗ҆́кѡ ѿ себѐ, но дово́льство на́ше ѿ бг҃а. ѕ҃ И҆́же и҆ ᲂу҆дово́ли на́съ слꙋжи́тели бы́ти но́вꙋ завѣ́тꙋ, не пи́смене, но дх҃ꙋ: писмѧ́ бо ᲂу҆бива́етъ, а҆ дх҃ъ (л. р҃л ѡ҆б.) животвори́тъ. [д҃] з҃ А҆́ще ли слꙋже́нїе сме́рти писмены̀ ѡ҆бразова́но въ ка́менехъ, бы́сть въ сла́вꙋ, ꙗ҆́кѡ не мощѝ взира́ти сынѡ́мъ і҆и҃левымъ на лицѐ мѡѷсе́ово сла́вы ра́ди лица̀ є҆гѡ̀ престаю́щїѧ: и҃ Ка́кѡ не мно́жае па́че слꙋже́нїе дх҃а бꙋ́детъ въ сла́вѣ; ѳ҃ А҆́ще бо слꙋже́нїе ѡ҆сꙋжде́нїѧ, сла́ва: мно́гѡ па́че и҆збы́точествꙋетъ слꙋже́нїе пра́вды въ сла́вѣ. і҃ И҆́бо не просла́висѧ просла́вленное въ ча́сти се́й, за превосходѧ́щꙋю сла́вꙋ. а҃і А҆́ще бо престаю́щее, сла́вою: мно́гѡ па́че пребыва́ющее, въ сла́вѣ. Коне́цъ средѣ̀, и҆ ᲂу҆брꙋ́сꙋ. (заⷱ҇ рѻ҃д) в҃і И҆мꙋ́ще ᲂу҆̀бо꙳[11] таково̀ ᲂу҆пова́нїе, мно́гимъ дерзнове́нїемъ дѣ́йствꙋемъ: г҃і И҆ не ꙗ҆́коже мѡѷсе́й полага́ше покрыва́ло на лицѣ̀ свое́мъ, за є҆́же не мощѝ взира́ти сынѡ́мъ і҆и҃левымъ на коне́цъ престаю́щагѡ: д҃і Но ѡ҆слѣпи́шасѧ помышлє́нїѧ и҆́хъ: да́же бо до сегѡ̀ днѐ, то́жде покрыва́ло во чте́нїи ве́тхагѡ завѣ́та пребыва́етъ неѿкрове́но, занѐ ѡ҆ хрⷭ҇тѣ̀ престае́тъ. є҃і Но да́же до дне́сь, внегда̀ чте́тсѧ мѡѷсе́й, покрыва́ло на се́рдцѣ и҆́хъ лежи́тъ: ѕ҃і Внегда́ же ѡ҆братѧ́тсѧ ко гдⷭ҇ꙋ, взима́етсѧ покрыва́ло. з҃і Гдⷭ҇ь же дх҃ъ є҆́сть: а҆ и҆дѣ́же дх҃ъ гдⷭ҇нь, тꙋ̀ свобо́да. и҃і Мы́ же всѝ ѿкрове́ннымъ лице́мъ сла́вꙋ гдⷭ҇ню взира́юще, въ то́йже ѻ҆́бразъ преѡбразꙋ́емсѧ ѿ сла́вы въ сла́вꙋ, ꙗ҆́коже ѿ гдⷭ҇нѧ дх҃а. Коне́цъ сꙋббѡ́тѣ. (л. рл҃а) Глава̀ четве́ртаѧ. (заⷱ҇ рѻ҃є) [є҃] сⷯ а҃ Сегѡ̀ ра́ди и҆мꙋ́ще꙳[12] слꙋже́нїе сїѐ, ꙗ҆́коже поми́ловани бы́хомъ, не стꙋжа́емъ сѝ. в҃ Но ѿреко́хомсѧ та́йныхъ сра́ма, не въ лꙋка́вствїи ходѧ́ще, ни льстѧ́ще словесѐ бж҃їѧ, но ꙗ҆вле́нїемъ и҆́стины, представлѧ́юще себѐ ко всѧ́кой со́вѣсти чл҃вѣ́честѣй, пред̾ бг҃омъ. г҃ А҆́ще ли же є҆́сть покрове́но бл҃говѣствова́нїе на́ше, въ ги́бнꙋщихъ є҆́сть покрове́но: д҃ Въ ни́хже бо́гъ вѣ́ка сегѡ̀ ѡ҆слѣпѝ ра́зꙋмы невѣ́рныхъ, во є҆́же не возсїѧ́ти и҆̀мъ свѣ́тꙋ бл҃говѣствова́нїѧ сла́вы хрⷭ҇то́вы, и҆́же є҆́сть ѻ҆́бразъ бг҃а неви́димагѡ. є҃ Не себе́ бо проповѣ́даемъ, но хрⷭ҇та̀ і҆и҃са, гдⷭ҇а: себе́ же самѣ́хъ, рабы̑ ва́мъ і҆и҃са [гдⷭ҇а] ра́ди. (заⷱ҇ рѻ҃ѕ) ѕ҃ Ꙗ҆́кѡ бг҃ъ꙳꙳[13] рекі́й и҆з̾ тмы̀ свѣ́тꙋ возсїѧ́ти, и҆́же возсїѧ̀ въ срⷣца́хъ на́шихъ, къ просвѣще́нїю ра́зꙋма сла́вы бж҃їѧ, ѡ҆ лицѣ̀ і҆и҃съ хрⷭ҇то́вѣ. Коне́цъ четверткꙋ̀. [ѕ҃] з҃ И҆́мамы же сокро́вище сїѐ въ скꙋде́льныхъ сосꙋ́дѣхъ, да премно́жество си́лы бꙋ́детъ бж҃їѧ, а҆ не ѿ на́съ. и҃ Во все́мъ скорбѧ́ще, но не стꙋжа́юще сѝ: не ча́еми, но не ѿчаѧва́еми: ѳ҃ Гони́ми, но не ѡ҆ставлѧ́еми: низлага́еми, но не погиба́юще. і҃ Всегда̀ ме́ртвость гдⷭ҇а і҆и҃са въ тѣ́лѣ носѧ́ще, да и҆ живо́тъ і҆и҃совъ въ тѣ́лѣ на́шемъ ꙗ҆ви́тсѧ. а҃і При́снѡ бо мы̀ живі́и въ (л. рл҃а ѡ҆б.) сме́рть предае́мсѧ і҆и҃са ра́ди, да и҆ живо́тъ і҆и҃совъ ꙗ҆ви́тсѧ въ ме́ртвеннѣй пло́ти на́шей. в҃і Тѣ́мже сме́рть ᲂу҆́бѡ въ на́съ дѣ́йствꙋетъ, а҆ живо́тъ въ ва́съ. (заⷱ҇ рѻ҃з) г҃і И҆мꙋ́ще же꙳[14] то́йже дх҃ъ вѣ́ры, по пи́санномꙋ: вѣ́ровахъ, тѣ́мже возглаго́лахъ, и҆ мы̀ вѣ́рꙋемъ, тѣ́мже и҆ глаго́лемъ: д҃і Вѣ́дѧще, ꙗ҆́кѡ воздви́гїй гдⷭ҇а і҆и҃са, и҆ на́съ со і҆и҃сомъ воздви́гнетъ, и҆ предпоста́витъ съ ва́ми. є҃і Всѧ̑ бо ва́съ ра́ди, да благода́ть ᲂу҆мно́жившаѧсѧ, мно́жайшими бл҃годаре́нїи и҆збы́точествитъ въ сла́вꙋ бж҃їю. Коне́цъ недѣ́ли, и҆ преподѡ́бнымъ. ѕ҃і Тѣ́мже не стꙋжа́емъ сѝ: но а҆́ще и҆ внѣ́шнїй на́шъ человѣ́къ тлѣ́етъ, но внꙋ́треннїй ѡ҆бновлѧ́етсѧ по всѧ̀ днѝ. з҃і Є҆́же бо ны́нѣ ле́гкое печа́ли на́шеѧ, по преꙋмноже́нїю въ преспѣ́ѧнїе, тѧготꙋ̀ вѣ́чныѧ сла́вы содѣ́ловаетъ на́мъ. и҃і Не смотрѧ́ющымъ на́мъ ви́димыхъ, но неви́димыхъ: ви̑димаѧ бо вре́мєнна, неви̑димаѧ же вѣ̑чна. Коне́цъ пѧткꙋ̀.
www.церковно-славянская-библия.рф
X
Книга Премудрости Иисуса сына Сирахова (Сирах) Великий Пяток great and holy friday 1 послание к Тимофею апостола Павла Второе послание к Тимофею Светлая седмица (с понедельника по субботу) аггей • www.церковно-славянская-библия.рф пророк Аггей Соборное послание второе святого апостола Иоанна Богослова the second general Epistle of the holy apostle john the theologian 1 послание апостола павла к солунянам • www.церковно-славянская-библия.рф 1 к солунянам Толкование Библии Лопухина Синодальный перевод. Вторая книга Паралипоменон (2Пар) Деяния святых апостолов Сборник месяцей — pericopes для фиксированных праздников на каждый день К филиппийцам послание святого апостола Павла the Epistle of the holy apostle paul to the philippians. Церковно-славянский язык
 

23.20.147.6